كولساي كولدەرى — كۇنگەي الاتاۋى مەن ىلە الاتاۋىنىڭ جوتالارىن بىرىكتىرەتىن سولتۇستىك تيان-شانداعى ٴۇش كولدىڭ جۇيەسى. كولساي وزەنىنىڭ اعىمىندا ٴارتۇرلى بيىكتىكتە قاتار ورنالاسقان.
جوعارعى كولساي تەڭىز دەڭگەيىنەن 2 650 م بيىكتىكتە، ورتاڭعىسى — 2 280 م، تومەنگىسى — 1 800 م بيىكتىكتە جاتىر. تومەنگى كولدىڭ ۇزىندىعى 1 520 م، ورتاشا ەنى 222 م.
كورشىلەس قايىڭدى كولى 1911 جىلعى قاتتى جەر سىلكىنىسىنەن پايدا بولعان: اڭعاردى سۋ باسىپ، اعاشتار سۋدىڭ استىندا قالعان. كول سۋى جازدا دا +6 گرادۋس شاماسىندا بولعاندىقتان، اعاش قىلقاندارى ٴالى كۇنگە ساقتالعان.
