وڭتۇستىك قازاقستان وبلىسى بايدىبەك اۋدانى بايدىبەك اتا اۋىلىنىڭ ايماعىندا ورنالاسقان. بايدىبەك بي كەسەنەسى 1996 جىلى بالابوگەن وزەنىنىڭ بيىك جاعالاۋىندا قاراحان ٴداۋىرى ۇلگىسىندە ساقتالعان كونە مازار كۇمبەزىنىڭ ورنىنا، جاڭا ۇلگىدە قايتا سالىندى.
قاراشاۇلى بايدىبەك (شامامەن 1356-1419) جەتىسۋ الابىنداعى كوشپەلى تايپالار كوسەمى. ۇرپاقتارىنىڭ ايتۋىنشا، تۋعان جەرى تاشكەنت. قاراتاۋ ولكەسىندە ٴومىر سۇرگەن. اقىل-پاراساتىمەن، ەرلىك ىستەرىمەن ەلگە ۇيىتقى بولعان تاريحي تۇلعا. ٴوز زامانىندا كوشپەلى ەلدىڭ باسىن بىرىكتىرىپ، ەلدى، جەردى سىرتقى جاۋ شاپقىنشىلىعىنان قورعاۋدى ۇيىمداستىرۋشى جانە باستاۋشى، اقىلشى، قولباسشى رەتىندە كورىنەتىن اسا ٴىرى تاريحي تۇلعا بولعان. ەل ىشىندەگى قارييا سوزدەر – دالالىق اۋىزشا تاريحناما بويىنشا، ۇلى ٴجۇزدىڭ ٴۇيسىن بىرلەستىگىنىڭ قۇرامىنداعى البان، سۋان، ٴسارىۇيسىن، شاپىراشتى، ىستى، وشاقتى تايپالارى بايدىبەكتى وزدەرىنىڭ ٴتۇپ اتاسى دەپ بىلەدى. بايدىبەك بي جالپاق جاتقان جەتىسۋدى، ارىس وزەنىنىڭ شۇرايلى القاپتارىن، قاراتاۋ مەن تاشكەنت الابىن قونىس ەتىپ، ونداعى رۋ-تايپالاردىڭ باس بىرىكتىرۋىنە، ۇلى جۇزگە ۇيىتقى، ەل بولىپ ۇيىسۋىنا ىقپال ەتكەن.ونىڭ ٴومىرى، زامانى، وسكەن ورتاسى جايلى تاريحي دەرەكتەمەلەر نەگىزگى قازاق ەلىنىڭ شەجىرەسى، ەل ىشىندە ساقتالعان اڭىز-اڭگىمە جانە ايگىلى شىعىس زەرتتەۋشىسى عالىم-ەتنوگراف نيكولاي اريستوۆ، شوقان ٴۋاليحانوۆ جازبالارى ارقىلى باياندالادى.
سىلتەمە: قازاقستاننىڭ جالپىۇلتتىق قاسيەتتى نىساندارى. –استانا: فوليانت، 2017. –191-192 بب.
