وڭتۇستىك قازاقستان وبلىسى قاراتاۋدىڭ كۇنەگەي بەتىندە بالابوگەن وزەنىنىڭ اڭعارىندا ورنالاسقان.دومالاق انا كەسەنەسى باستاپقىدا جىلى كۇمبەزدەرى بار قابىرعالىق مازار تۇرىندە سالىنعان. كەسەنە بىرنەشە رەت قايتادان سالىنىپ، قازىرگى ۋاقىتقا ونىڭ باستاپقىداعى كەيپى جەتپەگەن. كەسەنەگە 1996 جىلى ساۋلەتشى س.توقتامىستىڭ جوباسى بويىنشا كۇردەلى قالپىنا كەلتىرۋ جۇمىستارى جۇرگىزىلدى.
كەسەنەدومالاق انانىڭ (شىن ەسىمى نۇريلا) بەيىتىنىڭ باسىنا تۇرعىزىلعان. دومالاق (نۇريلا) انا تۇركىستاندىق ماقتىم اعزام قوجانىڭ نەمەرەسى. 1378 جىلى تۇركىستان قالاسىندا ومىرگە كەلگەن. اتاسى ماقتىم اعزامنىڭ وسيەتىمەن دومالاق انا ون توعىز جاسىندا (1397) بايدىبەك بيگە تۇرمىسقا شىعادى. ەل ىشىندەگى دەرەكتەرگە قاراعاندا، وعان «ديحنات ماما» دەگەن اتاۋدى ٴتۇپ تەگى تۇرىكپەن قارا حايدار دەگەن كىسى قويعان. «ديحنات ماما» – پارسى ٴسوزى. قازاق تىلىندە «اۋليە انا» دەگەن ماعىنا بەرەدى. «ديحنات ماما» ٴسوزى ۋاقىت وتە كەلە دىبىستىق وزگەرىستەرگە ۇشىراپ، «دومالاق اناعا» اينالعان. ودان تاراعان ۇرپاقتارىنىڭ ٴبارى دە بىلىمىمەن، اقىلىمەن ەرەكشەلەنىپ، ەل بيلەگەن.
اڭىز بويىنشا، دومالاق انا كەسەنەسىندە ەكى كيەلى تاس بار، ونىڭ اراسىنان تەك تاقۋا ادام وتە الادى. بۇل كۇمبەز-زيرات ەلدىڭ ارنايى كەلىپ زيارات ەتەتىن ورنىنا اينالعان.
سىلتەمە: قازاقستاننىڭ جالپىۇلتتىق قاسيەتتى نىساندارى. –استانا: فوليانت، 2017. –193-196 بب.
