نۇر-سۇلتانداعى «ماڭگىلىك ەل» سالتانات قاقپاسى بىرەگەي ساۋلەت ەسكەرتكىشى قر پرەزيدەنتىنىڭ باستاماسىمەن 2011 جىلى قازاقستان رەسپۋبليكاسىنىڭ تاۋەلسىزدىگىنىڭ 20 جىلدىعىنا وراي اشىلدى.
تاريحقا تەرەڭ بويلاساق، «ماڭگىلىك ەل» بولۋدىڭ ماقسات-مۇراتى ٴتۇبى ٴبىر تۇركى حالىقتارى ٴۇشىن ارمان-تىلەكتىڭ ەڭ ۇلكەنى. تۇركى شەجىرەسىندە «ماڭگى» ٴسوزى «ٴتاڭىر»، «قۇداي»، «اللا» سوزدەرىمەن ماعىنالاس قولدانىلعان. قازاقستان بۇگىنگى تاڭدا دامىعان ەلدەرمەن تەرەزەسى تەڭ، الەمدىك قاۋىمداستىق تانىعان، ابىرويلى مەملەكەتكە اينالدى. ال ونىڭ ورتالىعى نۇر-سۇلتاندا – ماڭىزدى شەشىمدەر قابىلداناتىن، الەمنىڭ سپورت، مادەنيەت، ٴبىلىم جانە عىلىم سالالارىنىڭ وكىلدەرى باس قوساتىن ەۋروپا مەن ازييانىڭ اراسىنداعى التىن كوپىر ىسپەتتەس.
«ماڭگىلىك ەل» مونۋمەنتى گرانيت پەن ٴمارماردان جاسالدى. اركا قازاق ويۋلارىمەن بەزەندىرىلگەن. ساۋلەتتىك كونسترۋكتسييانىڭ بيىكتىگى – 20 مەتر، ال ەنىنىڭ 13 مەتر بولۋىنىڭ دا وزىندىك ٴمان-ماعىناسى بار. قازاق ٴوز ۇلىن «ون ۇشتە وتاۋ يەسى» دەپ ىرگە كوتەرگەن بالاسىنا ەر بولۋدىڭ، ٴوزى ٴۇشىن عانا ەمەس، وتباسى مەن تۇتاس ەلگە جاۋاپتى بولۋدىڭ العاشقى جولىن نۇسقاعان. قاقپانىڭ سول جاعىنا قازاق ۇلتىنىڭ ساناسىندا ەرتەدەن قالىپتاسقان – دانالىق، دانىشپاندىق، عۇلامالىق نىشانى، حالىقتىڭ رۋحى مەن ويىنىڭ قورعاۋشىسى – اقساقالدىڭ ٴمۇسىنى قويىلعان. قاقپانىڭ وڭ جاق بەتىندە وتباسىنىڭ ۇيىتقىسى – ايەل-انانىڭ بەدەرلى ٴمۇسىنى ورناتىلعان.
ەلورداداعى «ماڭگىلىك ەلدىڭ» بەت-بەدەرىندە بەرگىسى قازاق تاريحىمەن بىرگە، ارعىسى ۇلى دالانى دۇبىرگە تولتىرعان تۇركى زامانىنىڭ ايشىعى جاتىر.
سىلتەمە: قازاقستاننىڭ جالپىۇلتتىق قاسيەتتى نىساندارى. –استانا: فوليانت، 2017. –478-480-بب.
