بۇرىنعى مۇسىلمان مەكتەبى نۇر-سۇلتان قالاسىنىڭ ورتالىعىندا، اباي كوشەسى مەن رەسپۋبليكا داڭعىلىنىڭ قيىلىسىندا، قازىرگى ق.قۋانىشباەۆ اتىنداعى قازاق مۋزىكالىق دراما تەاترىنىڭ ۇيىندە ورنالاسقان. عيمارات ٴحىح عاسىردىڭ سوڭى – حح عاسىردىڭ باسىنداعى اعاش ونەرى قۇرىلىسىنىڭ ەرەكشە ۇلگىسى بولىپ سانالادى.
ٴۇيدى اقمولالىق كوپەس س.بەلوۆ سالدىرتقان. كەيىن كوپەس ٴۇيدى تاتار-مۇسىلمان قاۋىمداستىعىنا ساتادى. ەسكەرتكىشتىڭ بۇدان كەيىنگى تاريحى ٴبىلىم بەرۋ سالاسىمەن بايلانىستى. حح عاسىردىڭ باسىندا مۇندا قىزدارعا ارنالعان اقمولا قالاسى ٴبىرىنشى مۇسىلمان مەكتەبى ورنالاستى. 1907 جىلدان باستاپ بۇل ۇيدە قىرعىز-تاتار باستاۋىش مەكتەبى جۇمىس ىستەيدى، وندا 27 وقۋشى ٴدارىس العان. كەڭەستىك كەزەڭدە مەكتەپ 7 جىلدىق ٴبىلىم جۇيەسىنە اۋىستى. قىزدار مەن ۇلدار بولەك وقىدى. 1912-1916 جىلدارى وسى مەكتەپتە كورنەكتى اقىن، جازۋشى، قوعام قايراتكەرى ساكەن سەيفۋللين ٴدارىس بەرگەن.
1960 جىلداردىڭ باسىندا عيمارات بالالار باقشاسىنا بەرىلىپ، 1990 جىلداردىڭ ورتاسىنا دەيىن پايدالانىلسا، 1996 جىلى ق.قۋانىشباەۆ اتىنداعى قازاق مۋزىكالىق-دراما تەاترىنا بەرىلدى. قازىرگى ۋاقىتتا تەاتردىڭ رەكۆيزيتتەر دايارلايتىن كوركەم-قويىلىمدىق شەبەرحاناسى رەتىندە پايدالانىلىپ كەلدى.
