رابييا سۇلتان بەگىم كەسەنەسى – ورتاعاسىرلىق ساۋلەت ونەرى ەسكەرتكىشى (XV ع.). قوجا احمەت ياساۋي كەسەنەسىنىڭ وڭتۇستىك-شىعىسىندا، 60 م جەردە. ٴامىر تەمىردىڭ نەمەرەسى، ۇلىقبەكتىڭ قىزى، ٴابىلقايىر حاننىڭ ايەلى، بەلگىلى حاندار كوكەنشى مەن ٴسۇيىنىشتىڭ اناسى رابييا سۇلتان بەگىمگە ارنايى سالدىرىلعان. كەسەنەنىڭ وڭتۇستىك-شىعىس بولىگىندە جەراستى ٴقابىرحاناعا كىرەتىن ەسىك بار. ٴقابىرحانا سىلانىپ، بويالعان. وندا تەرىمەن قاپتالعان اعاش تابىتتار قويىلعان. رابييا سۇلتان بەگىمنىڭ تابىتىندا «بۇل قۇدىرەتتى ٴامىر تەمىر كورەگەننىڭ ۇلى، ازاپتى اجالدان قازا تاپقان، قۇدىرەتتى، ۇلى سۇلتان ۇلىقبەك گۋراگاننىڭ قىزى، اقسۇيەك، (قۇداي) كەشىرىپ، راقىمشىلىق جاساعان، ىزگى جاساندى رابييا سۇلتان بەگىمنىڭ تىنىشتىق تاۋىپ جاتقان جەرى» دەگەن جولدار بار.
رابييا سۇلتان بەگىم شامامەن 1430–1495 جىلدارى ٴومىر سۇرگەن. سامارقان قالاسىندا ٴوسىپ، جان-جاقتى ٴبىلىم العان. 1451 جىلى ٴامىر تەمىردىڭ نەمەرەسى ٴابۋ سايد سامارقاندى جاۋلاپ العاندا ٴابىلقايىر حانعا كورسەتكەن اسكەري كومەگى ٴۇشىن ۇلىقبەكتىڭ قىزى ٴرابييا سۇلتان بەگىمدى ۇزاتقان. ابىلقايىرمەن 16 جىل وتاسىپ، 1468 جىلى قايتىس بولعاندا، ٴابىلقايىردان ٴسۇيىنىش جانە كىشكەنە دەگەن 2 ۇل تابادى. رابييا سۇلتان بەگىم كەزىندە مەملەكەتتىك ىستەردى باسقارۋعا قاتىسقان ساناۋلى مۇسىلمان ايەلدەرىنىڭ ٴبىرى بولدى. تاريحتا بەلگىلى كوشكىنشى جانە ٴسۇيىنىش قوجا حانداردىڭ اناسى. 1495-1510 جىلى بالاسى كوشكىنشى حاننىڭ پارمەنىمەن ونىڭ باسىنا كەسەنە تۇرعىزىلعان.
سىلتەمە: قازاقستاننىڭ وڭىرلىك قاسيەتتى نىساندارى. –استانا: فوليانت، 2017. –209-ب.
