ماڭعىستاۋ وبلىسى ٴتۇپقاراعان اۋدانى تاۋشىق ەلدى مەكەنىنەن 40 شاقىرىم قاشىقتىقتا سولتۇستىك-باتىس باعىتتا سارىتاس-قوشاق شىعاناعىنا تاياۋ وڭعازى تاۋىنىڭ ەتەگىندە ورنالاسقان.شاقپاق اتا قورىمى جانە جەراستى مەشىتى (Iح-ح عع.) – مەشىتتەردىڭ اسا كوركەم ۇلگىسى بولىپ تابىلادى.
ەل اۋزىندا ساقتالعان مالىمەتتەرگە قاراعاندا، شاقپاق اتا مۇسىلمانشىلىقتى تەرەڭ مەڭگەرگەن، شاكىرت تاربيەلەپ، بالا وقىتقان، دىندارلىعىمەن قاتار قالماقتارمەن سوعىستا اتاعى شىققان باتىر بولىپتى. جارتاس ىشىندەگى جاساندى ۇڭگىر تۇرىندە جاسالعان مەشىتتىڭ ىشكى بولمەلەرى ورتالىق زال ارقىلى شارباق ٴتارىزدى ورنالاسىپ، سولتۇستىك، وڭتۇستىك، باتىس، شىعىسقا قاراي باعىشتالعان. سەرىكبول قوندىبايدىڭ ميفولوگييالىق زەرتتەۋىندە شاقپاق اتا – ولگەندەردى جەلەپ-جەبەۋشى، جىلانداردىڭ ٴامىرشىسى. تاريحي تۇلعا رەتىندە شىن اتى – شاحماردان، ول – شوپان اتانىڭ نەمەرەسى. شاقپاق اتا دەگەن اتقا يە بولعان سەبەبى – جاۋمەن شايقاستا قارۋىنان وتتىڭ ۇشقىندارى شىققان. اڭىز دەرەكتەر بويىنشا، وت كەرەك بولعاندا شاقپاق اتا ٴبىر تىرناعىن ەكىنشى تىرناعىنا تيگىزسە بولعانى، ۇشقىندار جان-جاققا شاشىرايدى ەكەن. ونى حالىق تاستان وت شىعارىپ، جاۋىن وتپەن كۇيدىرىپ جىبەرەتىن قۇدىرەتى ٴۇشىن قۇرمەتتەگەن.
تاريحشى ا. مەدوەۆ سوپىنىڭ ٴومىر سۇرگەن ۋاقىتى IX عاسىر دەپ جوبالايدى، ال ۆ.ۆ. بارتولد بولسا، شاقپاق اتا 1312-1342 جىلدارى وزبەك حاننىڭ كەزىندە ٴومىر سۇرگەن دەپ تۇجىرىمدايدى (XIV ع.).
سىلتەمە: قازاقستاننىڭ جالپىۇلتتىق قاسيەتتى نىساندارى. –استانا: فوليانت، 2017. –233-234-بب.
