الماتى وبلىسى، جامبىل اۋدانى جامبىل اۋىلىندا ورنالاسقان جامبىل جاباەۆ كەسەنەسى 1946 جىلى سالىنعان. 1970 جانە 1996 جج. قايتا جوندەلىپ، اق مارمارمەن قاپتالعان. كەسەنە ٴبىر كامەرالى، پورتالدى سەگىز قىرلى عيمارات. بيىكتىگى 10 م، كۇيدىرىلگەن كىرپىشتەن قالانعان، ون التى قىرلى باراباندى كونۋس ٴتارىزدى كۇمبەزبەن اياقتالعان. كەسەنەنىڭ ٴدال ىرگەسىندە، سول جاق بوساعاسىنا اقىننىڭ كيەسى – قىزىل شۇبار جولبارىس ٴمۇسىنى ورناتىلعان.
جامبىل جاباەۆ (1846-1945) – اقىن، جىراۋ، جىرشى. قازان توڭكەرىسىنە دەيىنگى نەگىزگى شىعارماشىلىعى – ايتىس. اقىن ٴوزىنىڭ جىرلارىندا باتىرلار تۋرالى، ولاردىڭ ەرلىك ىستەرى تۋرالى جىرلاعان. سوعىس جىلدارىندا قورشاۋداعى لەنينگراد قالاسىن قورعاعان باتىرلارعا ارناپ جازعان «لەنينگرادتىق ورەنىم» اتتى ولەڭى – كوپۇلتتى كەڭەس ادەبيەتىنىڭ ەڭ ۇزدىك شىعارماسى. جامبىل جىراۋ قيسسا، داستان، تەرمە، باتىرلىق جىرلاردى جاتقا بىلگەن. جامبىل «جىر تۇلپارى ٴسۇيىنباي»، «مەنىڭ ٴپىرىم – ٴسۇيىنباي، ٴسوز سويلەمەن سيىنباي» دەپ، ٴسۇيىنباي اقىندى ۇلگى تۇتىپ، باتاسىن العان. ول ٴبىر تويدا توعىز اقىندى قاتار جەڭگەن قۇلمانبەتتى ورالىمدى ويى مەن ۇتىمدى ٴسوز ساپتاسىنىڭ ارقاسىندا جەڭىپ كەتەدى. جامبىل «كورۇعلى»، ت.ب. ەجەلگى ەپيكالىق جىر-داستانداردى جاتقا بىلگەن. جامبىلدىڭ كوزى تىرىسىندە اۋليەاتا شاھارىنا ەسىمى بەرىلگەن. جىر ٴدۇلدۇلى سول ساتتە: اتىڭنان اينالايىن، اۋليەاتا، اتىڭدى اپ قويدى دەپ بولما قاپا، – دەپ سۋىرىپ سالىپ ولەڭ ارناعان.
سىلتەمە: قازاقستاننىڭ جالپىۇلتتىق قاسيەتتى نىساندارى. –استانا: فوليانت، 2017. –405-407-بب.
