كۇيشى مامەن مۇراتۇلىنىڭ كەسەنەسى باتىس قازاقستان وبلىسى جاڭاقالا اۋدانى پياتيمار اۋىلىندا ورنالاسقان. قاسيەتتى نارىندى تۋعان دارىندى كۇيشى-كومپوزيتورلاردىڭ ٴبىرى دە بىرەگەيى مامەن مۇراتۇلى باتىس قازاقستان وبلىسى جاڭاقالا اۋدانى قامىسسامار دەگەن جەردە (1868-1931) ٴومىر سۇرگەن.
مامەن – التىن ورداداعى مۋزىكالىق ۇلكەن قوردى جەتكىزۋشىلەردىڭ ٴبىرى. ٴوزى الدىن كورگەن قۇرمانعازىنىڭ ولمەس ونەرىن جالعاستىرىپ، شەبەر ورىنداۋشىلىعىمەن عانا ەمەس، كۇي شىعارۋىمەن دە وسى ولكە تاريحىندا قالعان ادام. قۇرمانعازىدان تاعىلىم الىپ، حالىق اراسىندا ونىڭ كۇيلەرىن («اداي»، «بايجۇما»، «تورەمۇرات»، «تەرىسقاقپاي»، ت.ب.) ناسيحاتتادى. ۇستازىنىڭ ورىنداۋشىلىق ناقىشىن تەرەڭ مەڭگەرگەن مامەن ٴوز جانىنان «اق شولپان»، «قايعىلى قارا»، «قاراجان حانىم»، «كەربەز اقجەلەڭ»، تاعى دا باسقا كۇيلەر شىعارعان. حح عاسىردىڭ باسىندا قازاق دالاسىندا بولعان الاساپىران كەزەڭدى مەڭزەيتىن «1916 جىل»، «1917 جىل» اتتى كۇيلەرى بار. مامەن كۇيلەرى تەرەڭ تولعانىسپەن، سەرپىندى دە ويناقى اۋەن ىرعاعىمەن جىگەرلەندىرەتىن ورالىمدارعا باي شىعارمالار.
مامەننىڭ كۇيشىلىك، ورىنداۋشىلىق شەبەرلىگىن ونەر زەرتتەۋشىلەرى جوعارى باعالاعان. ونىڭ شاكىرتتەرى رەتىندە دومبىراشىلار ر.وماروۆ، ٴا.ەسقاليەۆ، ب.قارابالينا سىندى ونەر مايتالماندارى ەلگە تانىلدى.
سىلتەمە: قازاقستاننىڭ وڭىرلىك قاسيەتتى نىساندارى. استانا:«فوليانت» 2017، –201 ب؛ قاسيەتتى قازاقستان. 2-توم. –استانا: 2018. –288-ب.
