ماڭعىستاۋ وبلىسى ماڭعىستاۋ اۋدانى ۇشتاعان اۋىلىنان 15 شاقىرىم قاشىقتىقتا وڭتۇستىك-شىعىستا ورنالاسقان. ماسات اتا قورىمى جانە جەراستى مەشىتى شامامەن ح–حIح عع. جاتادى. مەشىتتىڭ ىشكى اۋماعى ٴتورت قانات ۇيدەي، توبەسىندە شاڭىراق ٴتارىزدى ويىق بار.
ماسات اتا-يسلام ٴدىنىنىڭ ورنىعۋىنا اتسالىسقان بەلگىلى تۇلعا، ەلىن جاۋدان قورعاعان باتىر. قالماققا قارسى قاندى جورىقتار جاساعان ەرلەردىڭ اراسىندا ايرىقشا اتالىپ، دارىپتەلەتىن، ەلىن جاۋدان قورعاپ، ارپالىسىپ وتكەن باتىر. اڭىز بويىنشا، جاۋلارى ماسات اتانى ٴولتىرۋدىڭ سان الۋان ٴادىسىن جاسايدى، ٴبىراق ەش ناتيجە شىعارا المايدى. ماسات اتا تاڭ نامازىنا تۇرعاندا دەنەسىنىڭ جۇيە-جۇيەسى بوساپ، السىزدەنەدى، ال توڭىرەك، قۇم مەن تاس تا ەريدى ەكەن دەسەدى. مىنە، وسىنداي ساتتە جاۋ دا كەلىپ ماسات اتانىڭ باسىن شاپقان. شابىلعان باس جايۋلى جاينامازعا تۇسەدى. ماسات اتا باسىن جاينامازعا وراعان كۇيدە ۇيدەن شىعا جۇگىرگەن، سوندا ٴۇي قاسىنداعى قۇلىنى بار ساۋىن بيە دە ارتىنان ەرگەن ەكەن. اۋليەنىڭ دە، قۇلىن مەن بيەنىڭ ىزدەرى دە، اتانىڭ موينىنان تامشىلاعان قاننىڭ ٴىزى دە جولدىڭ قۇبىلا تۇسىنداعى كوكتاسقا اينا-قاتەسىز ٴتۇسىپ قالعان. قۇلىندى-بيە جان ٴتاسىلىم ەتەدى. ال وپاسىز ادامنىڭ قولىنان ولگەن باتىر ٴوزىنىڭ دەنەسىن قالدىرماس ٴۇشىن كوككە ۇشىپ كەتكەن دەسەدى. ٴبىراق جەراستى مەشىتى سول كۇيىندە قالعان دەگەن اڭىزدار بار.
سىلتەمە: قازاقستاننىڭ جالپىۇلتتىق قاسيەتتى نىساندارى. –استانا: فوليانت، 2017. –231-232 بب.
