شىركەۋ تۇركىستان وبلىسىنىڭ ورتالىعى شىمكەنت قالاسىندا ورنالاسقان. ونىڭ ىرگەتاسى سىردارييا وبلىسى باسقارماسى قۇرىلىس ٴبولىمىنىڭ كىشى ساۋلەتشىسى ي.ا.ماركەۆيچتىڭ، قۇرلىستىق شەشىم ينجەنەرلەر ن.ي.بوتۆينكين جانە ر.پ.كوچاردىڭ جوباسى بويىنشا 1912 جىلى قالانىپ، 1914 جىلى سالىنىپ ٴبىتتى.
جوبانىڭ ٴوزى، ونىڭ ساۋلەتتىك-كوركەمدىك بولىگى، قىسقا مەرزىم ىشىندە جوعارى كوركەمدىك دەڭگەيدە ىسكە اسىرىلادى. ٴبىزدىڭ ۋاقىتىمىزعا دەيىن جەتكەن بىرنەشە جوبالىق سىزبالار – سونىڭ ايعاعى. جوبانى ماركەۆيچ بەكىتۋ ٴۇشىن سانكت-پەتەربۋرگ قالاسىنداعى ينجەنەرلىك كوميتەتتىڭ باس شتابىنا جىبەرەدى. باسىندا، ول شىعىسىندا – جارتىلاي دوڭگەلەكتى التار شوقىسى (اپسيدا)، شىعىسىندا كەڭ جابىن (كىرەبەرىس) جالعاستىرىلعان ٴتورت بۇرىشتى قۇرىلىس ەدى. كىشى شىركەۋ مەن شىركەۋ مۇناراسىن سوبور عيماراتىمەن بىرىكتىرەتىن كىشى شىركەۋ مەن گالەرەيانىڭ جوبالانعان باستاپقى نۇسقاسى سالىنبادى، شىركەۋ مۇناراسى كەيىننەن سالىنعان سيياقتى.
شىمكەنتتەگى سوبور، XIX عاسىردىڭ ەكىنشى جارتىسى — XX عاسىردىڭ باسىنداعى باسقا پراۆوسلاۆيە عيباداتحانالارى سەكىلدى جوبالانعان، سوندىقتان سىرتقى كورىنىسىنىڭ بولشەكتەرىنە XVII عاسىردىڭ ەجەلگى شىركەۋ ساۋلەت ونەرىن قولدانعان جانە ونى ماركەۆيچ قايتا وڭدەگەن. قازىرگى ۋاقىتتا سوبور عيماراتىندا وبلىستىق مەملەكەتتىك قۋىرشاق تەاترى ورنالاستىرىلعان.
سىلتەمە: قازاقستاننىڭ وڭىرلىك قاسيەتتى نىساندارى. –استانا: فوليانت، 2017. –390-ب.
