«وتان قورعاۋشىلار» مەموريالى 2001 جىلى نۇر-سۇلتان قالاسىندا اشىلدى. «وتان انا» مونۋمەنتى – قاھارلى سوعىس جىلدارى مايداندا ەل بوستاندىعى ٴۇشىن مەرت بولعان جاۋىنگەرلەر مەن ارامىزدا ۇلگى-ونەگە بولىپ جۇرگەن سوعىس ارداگەرلەرىنە دەگەن ەرەكشە قۇرمەت بەلگىسى. مەموريالدىڭ سيمۆوليكالىق مازمۇنى كەشەگى، بۇگىنگى جانە ەرتەڭگى ۇرپاقتار جالعاستىعىن بىلدىرەدى. ونىڭ وزەگى – الىپ مونۋمەنت – انا بەينەسى. اق كيمەشەكتى انا التىن زەرلى كەسەسىنە اق قۇيىپ، ۇلتتىق داستۇرگە ساي ونى كەلە جاتقاندارعا قوس قولداپ ۇسىنۋدا. قولادان قۇيىلعان ەسكەرتكىشتىڭ ۇشار باسىندا 121 التىن ماساقتان تۇراتىن نىسان – قازاقستان ۇلىستارىنىڭ بەرەكە-بىرلىگىنىڭ نىشانى. ماساقتاردىڭ ىرگەسى قازاق جەرىندە ٴار ۇلتتىڭ رۋحاني جانە مادەني مۇراسىن بەينەلەيتىن ويۋ-ورنەكتەرمەن بەزەندىرىلگەن. بۇل – جاڭا ٴومىر، بەيبىتشىلىك، مولشىلىق پەن تۇراقتىلىقتىڭ بەلگىسى.
مۇنداعى تاعى ٴبىر ەرەكشە كوڭىل اۋداراتىن تۇس – جەر شارىنىڭ بەينەلەنۋى. قىرىق مەتردەي قولا باعاننىڭ ەكى جاق قاپتالىنىڭ بىرىندە اتا-بابالارىمىزدان قالعان كەڭ-بايتاق مەكەنىمىزدى ٴارتۇرلى باسقىنشىلاردان قورعاعان حاس باتىرلار، ەكىنشى جاعىندا وتان سوعىسى جىلدارى ەرلىك كورسەتكەن قازاقستاندىق اسكەريلەر بەينەلەنگەن.
سىلتەمە: قازاقستاننىڭ جالپىۇلتتىق قاسيەتتى نىساندارى. –استانا: فوليانت، 2017. –469-470- بب.
