تەرەكتى اۋليە قاراعاندى وبلىسى جەزقازعان قالاسىنان 85 شاقىرىم قاشىقتىقتا، تەرەكتى ستانساسىنان سولتۇستىك-باتىسقا قاراي 20 شاقىرىم جەردە ورنالاسقان. حرونولوگييالىق مەرزىمى: قولا ٴداۋىرى (ب.د.د. 2-1 مىڭ جىلدىقتىڭ باسى)؛ سكيف-ٴسىبىر داۋىرىنە (ب.د.د. XII – ب.د. I ع.) جانە ورتا عاسىر.
«تەرەكتى اۋليە» كونە ٴداۋىردىڭ پەتروگليفتەرىمەن قاتار، ەرتە تەمىر داۋىرىندە باعالى مەتالداردى وندىرگەن ورىندار مەن ٴتۇرلى قورعانداردىڭ ٴىزى قالعان كيەلى مەكەن. پەتروگليفتەردىڭ اراسىندا ەڭ كوپ كەزدەسەتىنى – اتتىڭ سۋرەتى. سونىمەن قاتار، تۇيە، بۇقا، تەكە، بۇعى، جىلان، مىسىق تۇقىمداس جىرتقىش، سونداي-اق، قوس ات جەگىلگەن اربانىڭ سۋرەتتەرى دە بار. ال ٴتۇرلى بەلگىلەر مەن تاڭبالاردىڭ، گەومەترييالىق فيگۋرالاردىڭ كوپتەپ كەزدەسەتىندىگى بۇل جەردىڭ ەجەلگى داۋىردە قۇرباندىق شالاتىن ورىن بولعاندىعىن ايعاقتايدى. بۇل جەردەن كوشپەندىلەردىڭ جانۋارلارلاردىڭ بەينەلەرى ارقىلى تاڭىرلىك، ميفولوگييالىق، ٴدىني ٴپالساپالىق دۇنيەتانىمدارىن جانە 12 جىلدىق كۇنتىزبەسىن اڭعارۋعا بولادى. تەرەكتى اۋليەدەگى ىزدەر كوپتەگەن ميفتەر مەن اڭىزدارعا ارقاۋ بولدى.
سىلتەمە: قازاقستاننىڭ جالپىۇلتتىق قاسيەتتى نىساندارى. –استانا: فوليانت، 2017. –75-77 بب.
