تۇڭعىش پرەزيدەنتتىڭ تاريحي-مادەني ورتالىعى قاراعاندى وبلىسى تەمىرتاۋ قالاسىندا 2011 جىلى مەملەكەت باسشىسىنىڭ قاتىسۋىمەن اشىلدى. ورتالىق رۋحاني قالىپتاسۋعا، قازاقستاندىقتارعا رۋحاني-ادامگەرشىلىك، پاتريوتتىق تاربيە بەرۋگە، سونىمەن قاتار ۇلتتىق جانە الەمدىك ونەر مەن مادەنيەتكە قول جەتكىزۋگە باعىتتالعان.
ورتالىقتىڭ تاۋەلسىز قازاقستاننىڭ قالىپتاسۋ تاريحى مەن ەلباسىنىڭ ٴومىرى مەن قىزمەتىن باياندايتىن التى ەكسپوزيتسييالىق زالى بار. ٴبىرىنشى زال «تاۋەلسىز قازاقستان» دەپ اتالادى زالداعى ەكسپوناتتار ەلىمىزدىڭ تاۋەلسىزدىك العان العاشقى جىلدارىنىڭ تاريحىنان سىر شەرتەدى.
ەكىنشى زال «ٴوز زامانىنىڭ پەرزەنتى» دەپ اتالادى. زالدا بولاشاق ەلباسىنىڭ جاستىق شاعى، اتا-اناسى، تۋعان جەرى، مەكتەپتەگى كەزدەرى جانە ۋكراينانىڭ دنەپرودزەرجينسك قالاسىنداعى №8 تەحنيكالىق ۋچيليششەدە ٴبىلىم العان كەزەڭدەرىنە بايلانىستى فوتوسۋرەتتەر مەن قۇجاتتار ورىن العان.
«تۇلعانىڭ ەرەن قابىلەتى» اتتى ٴۇشىنشى زالدا ن. نازارباەۆتىڭ قاراعاندى مەتاللۋرگييا كومبيناتىنداعى ەڭبەك جولىنىڭ باستالۋى، ستۋدەنتتىك جىلدارى، بولاشاق پرەزيدەنتتىڭ وتباسىن قۇرۋىنا بايلانىستى جادىگەرلەر بار.
ٴتورتىنشى زال «قازاقستاننىڭ قۇرىش كەلبەتى» دەپ اتالادى. مۇندا جاڭا يننوۆاتسييالىق تەحنولوگييانى پايدالانىپ جاسالعان مەتاللۋرگييا ٴوندىرىسىنىڭ تولىق كەشەنى كورسەتىلگەن. «ۋاقىت اعىمىندا» اتتى بەسىنشى زال ن.ٴا. نازارباەۆتىڭ ساياسي ەڭبەك جولىنىڭ باستالۋى، ونىڭ تەمىرتاۋ قالالىق كومسومول كوميتەتىنىڭ ٴبىرىنشى حاتشىسىنان باستاپ، قازاقستاننىڭ تۇڭعىش پرەزيدەنتى بولىپ سايلانۋ تاريحى تۋرالى قۇندى مالىمەتتەر ورىن العان.
التىنشى زال «قازاقستان جولى» دەپ اتالادى. مۇندا قازاقستان تاۋەلسىزدىك العان كۇننەن قازىرگى داۋىرگە دەيىنگى ۋاقىتتا ەلباسىنىڭ باسشىلىعىمەن ەلىمىزدە ىسكە اسىرىلىپ جاتقان جاسامپاز ىستەر، تاۋەلسىزدىك جىلدارى قازاقستاندا بولعان ەلەۋلى قوعامدىق-ساياسي وقيعالار جانە ەكونوميكالىق جەتىستىكتەر تۋرالى ەكسپوناتتار ورىن العان.
سىلتەمە: قازاقستاننىڭ جالپىۇلتتىق قاسيەتتى نىساندارى. –استانا: فوليانت، 2017. –426-429-بب.
