Бұрын Қытайда берілген құжатты Қазақстанда қолдану үшін ұзақ консулдық заңдастырудан өту керек еді: алдымен Қытайдың сыртқы істер органдары, содан кейін Қазақстанның Қытайдағы елшілігі не консулдығы растайтын. Бұл айларға созылып, әр құжатқа бөлек төлем талап ететін.
Не өзгерді?
2023 жылғы 7 қарашадан бастап Қытай Халық Республикасы шетелдік ресми құжаттарды заңдастыру талабын жоятын 1961 жылғы Гаага конвенциясына (Апостиль конвенциясы) қосылды. Қазақстан бұл конвенцияға бұрыннан қатысады. Демек, енді Қытай құжатына бір ғана апостиль қойылса, ол Қазақстанда да жарамды.
Қай құжаттарға апостиль керек?
- Туу туралы куәлік — қандас мәртебесі мен азаматтық үшін
- Неке туралы куәлік және балалардың туу куәліктері
- Диплом және қосымшасы — оқуға түсу мен дипломды тану үшін
- Соттылығы жоқ екені туралы анықтама — «Ата жолы» картасы мен ықтиярхат үшін
- Ұлтыңызды растайтын құжат, егер ол жеке құжатта көрсетілмесе
Қадамдар
- Нотариалдық кеңсе. Туған жеріңіздегі нотариалдық кеңседен (公证处) құжаттың нотариалдық куәлігін алыңыз. Көп жағдайда куәлік ағылшын тіліндегі аудармасымен бірге беріледі.
- Апостиль. Нотариалдық куәлікке ҚХР Сыртқы істер министрлігі немесе оның уәкілетті жергілікті сыртқы істер басқармасы апостиль қояды.
- Аударма. Қазақстанға келген соң құжатты апостилімен бірге қазақ немесе орыс тіліне аударамыз.
- Аударманы куәландыру. Аудармашы қолын нотариус куәландырады — құжатыңыз енді enbek.kz, көші-қон қызметі не университетке тапсыруға дайын.
Жиі кездесетін қателер
Ең көп кездесетін қате — құжатты Қазақстанға келгеннен кейін ғана жинауға кірісу. Сол кезде бәрін Қытайдағы туыстар арқылы, сенімхатпен жасауға тура келеді, бұл уақытты екі-үш есе ұзартады. Екінші қате — есімдердің әр құжатта әртүрлі жазылуы: паспорттағы латын, куәліктегі иероглиф және аудармадағы кирилл жазуы бір-біріне сәйкес келуі тиіс.
Өнер ғылымдарының магистрі, режиссер-хореограф, қоғам белсендісі. «BASTAU LINE» ЖШС арқылы Қазақстан мен Қытай арасындағы құжаттарды дұрыс рәсімдеуге көмектеседі.
Автор туралы