بۇرىن قىتايدا بەرىلگەن قۇجاتتى قازاقستاندا قولدانۋ ٴۇشىن ۇزاق كونسۋلدىق زاڭداستىرۋدان ٴوتۋ كەرەك ەدى: الدىمەن قىتايدىڭ سىرتقى ىستەر ورگاندارى، سودان كەيىن قازاقستاننىڭ قىتايداعى ەلشىلىگى نە كونسۋلدىعى راستايتىن. بۇل ايلارعا سوزىلىپ، ٴار قۇجاتقا بولەك تولەم تالاپ ەتەتىن.
نە وزگەردى؟
2023 جىلعى 7 قاراشادان باستاپ قىتاي حالىق رەسپۋبليكاسى شەتەلدىك رەسمي قۇجاتتاردى زاڭداستىرۋ تالابىن جوياتىن 1961 جىلعى گااگا كونۆەنتسيياسىنا (اپوستيل كونۆەنتسيياسى) قوسىلدى. قازاقستان بۇل كونۆەنتسيياعا بۇرىننان قاتىسادى. دەمەك، ەندى قىتاي قۇجاتىنا ٴبىر عانا اپوستيل قويىلسا، ول قازاقستاندا دا جارامدى.
قاي قۇجاتتارعا اپوستيل كەرەك؟
- تۋۋ تۋرالى كۋالىك — قانداس مارتەبەسى مەن ازاماتتىق ٴۇشىن
- نەكە تۋرالى كۋالىك جانە بالالاردىڭ تۋۋ كۋالىكتەرى
- ديپلوم جانە قوسىمشاسى — وقۋعا ٴتۇسۋ مەن ديپلومدى تانۋ ٴۇشىن
- سوتتىلىعى جوق ەكەنى تۋرالى انىقتاما — «اتا جولى» كارتاسى مەن ىقتييارحات ٴۇشىن
- ۇلتىڭىزدى راستايتىن قۇجات، ەگەر ول جەكە قۇجاتتا كورسەتىلمەسە
قادامدار
- نوتاريالدىق كەڭسە. تۋعان جەرىڭىزدەگى نوتاريالدىق كەڭسەدەن (公证处) قۇجاتتىڭ نوتاريالدىق كۋالىگىن الىڭىز. كوپ جاعدايدا كۋالىك اعىلشىن تىلىندەگى اۋدارماسىمەن بىرگە بەرىلەدى.
- اپوستيل. نوتاريالدىق كۋالىككە قحر سىرتقى ىستەر مينيسترلىگى نەمەسە ونىڭ ۋاكىلەتتى جەرگىلىكتى سىرتقى ىستەر باسقارماسى اپوستيل قويادى.
- اۋدارما. قازاقستانعا كەلگەن سوڭ قۇجاتتى اپوستيلىمەن بىرگە قازاق نەمەسە ورىس تىلىنە اۋدارامىز.
- اۋدارمانى كۋالاندىرۋ. اۋدارماشى قولىن نوتاريۋس كۋالاندىرادى — قۇجاتىڭىز ەندى enbek.kz، كوشى-قون قىزمەتى نە ۋنيۆەرسيتەتكە تاپسىرۋعا دايىن.
ٴجيى كەزدەسەتىن قاتەلەر
ەڭ كوپ كەزدەسەتىن قاتە — قۇجاتتى قازاقستانعا كەلگەننەن كەيىن عانا جيناۋعا كىرىسۋ. سول كەزدە ٴبارىن قىتايداعى تۋىستار ارقىلى، سەنىمحاتپەن جاساۋعا تۋرا كەلەدى، بۇل ۋاقىتتى ەكى-ٴۇش ەسە ۇزارتادى. ەكىنشى قاتە — ەسىمدەردىڭ ٴار قۇجاتتا ٴارتۇرلى جازىلۋى: پاسپورتتاعى لاتىن، كۋالىكتەگى يەروگليف جانە اۋدارماداعى كيريلل جازۋى ٴبىر-بىرىنە سايكەس كەلۋى ٴتيىس.
ونەر عىلىمدارىنىڭ ماگيسترى، رەجيسسەر-حورەوگراف، قوعام بەلسەندىسى. «BASTAU LINE» جشس ارقىلى قازاقستان مەن قىتاي اراسىنداعى قۇجاتتاردى دۇرىس راسىمدەۋگە كومەكتەسەدى.
اۆتور تۋرالى