Батырлардың кесенелері Солтүстік Қазақстан облысы Айыртау ауданы Мәдениет ауылының жанындағы Құлшынбай төбесінде орналасқан.
Кесене XVII ғасырда өмір сүрген, Қазақ хандығының тәуелсіздігі үшін жоңғар басқыншыларымен күрескен батырлар Қарасай Алтынайұлы (1589-1671) мен Ағынтай(шамамен1599-1672) жерленген жерге тұрғызылды.1999 жылыашылған мемориалдық ескерткіш екі әскери дулыға кесенеден және олардың арасында конус пішінді мешіттен тұрады. Оның жанында біріктірілген найзалар тұр. Кесенелер айналасында зират-қорым орналасқан.
Қарасай мен Ағынтай қаһарман батырлар, әйгілі қолбасшылар, аса көрнекті тарихи тұлғалар. Өмір сүрген замандары қазақ-жоңғар арасында соғыстың енді тұтанып, енді шиеленісіп, бірте-бірте екі көшпелі елдің тактикасы мен стратегиясының сынға түсе бастаған кезі еді. Бұл кезде қазақ халқының дербес ел болып, ірге бекітіп, біртұтас этникалық сана-сезімнің орныққанына екі ғасырдың жүзі болған. Тегеуріні күшті қалмақ батырларымен әлденеше рет жекпе-жекке шығып, жеңіске жетіп отырған. Жауға қарсы шығудың жаңа тактикаларын, елді қорғаудың жаңа тәсілдерін көрсету арқылы мәртебелері өскен.
Сілтеме: Қазақстанның жалпыұлттық қасиетті нысандары. –Астана:Фолиант, 2017. –304-307-бб.
