احمەت بايتۇرسىنۇلىنىڭ ٴومىرى مەن شىعارماشىلىق جولىنا ارنالعان مادەني-عىلىمي مەكەنجاي الماتى قالاسى ا.بايتۇرسىنۇلى مەن جامبىل كوشەلەرىنىڭ قيىلىسىندا ورنالاسقان. 1934-1937 جىلدار ارالىعىندا ا.بايتۇرسىنۇلى تۇرعان ٴۇي مۋزەي رەتىندە 1998 جىلى اقىننىڭ 125 جىلدىق مەرەيتويى قارساڭىندا رەسمي تۇردە اشىلدى. مۋزەي-ٴۇي كۇردەلى جوندەۋدەن وتكىزىلىپ، قۇرىلىمى، ساۋلەتتىك سىرتقى ٴپىشىنى، اۋلاسى بۇرىنعى قالپىنا كەلتىرىلدى. مۋزەي ەكسپوزيتسيياسىن «ارىس» قورى (ع.انەس) جابدىقتادى. مۋزەي 1,5 قاباتتى عيماراتتان تۇرادى. وندا ٴتورت بولمە جانە ٴبىر بولمەدەن تۇراتىن جەرتولە بار. جەرتولە – مۋزەي مەن قوعامدىق قور قىزمەتكەرلەرىنىڭ كەڭسەسى. ٴۇش بولمە – كورمە زالى، ٴبىر بولمە احمەتتانۋ ٴدارىسحاناسى. عالىمنىڭ تۋعان كۇنى 5 قىركۇيەكتە جىل سايىن «تۇلعا تاعىلىمىنا – تاعزىم» اتتى ٴداستۇرلى احمەتتانۋ وقۋلارى وتكىزىلەدى. مۋزەي اۋلاسىنا ۇلت ۇستازى ا.بايتۇرسىنۇلىنىڭ ٴبيۋستى ورناتىلعان.
ا.بايتۇرسىنۇلى (1873-1938) – الاش كوسەمى، اقىن، ۇلى لينگۆيست، ادەبيەت زەرتتەۋشىسى، تۇرىكتانۋشى، پۋبليتسيست، پەدوگوگ، اۋدارماشى، قوعام قايراتكەرى. 1937 جىلى قازاندا تۇتقىنعا الىنىپ، بىرنەشە ايعا سوزىلعان تەرگەۋدەن سوڭ، 1938 جىلى اقپان ايىندا اتىلدى. قاماۋدا تەرگەۋشىلەردىڭ سۇراقتارىنا بىلاي جاۋاپ بەرگەن: «مەنىڭ ارمانىم – مۇمكىنشىلىگىنشە قازاق حالقىنىڭ داۋلەتتىلىگىن، مادەنيەتىن جوعارى دەڭگەيگە كوتەرۋ. ول ىزگى ٴىس ەندى عانا باسىن الىپ تۇرعاندىقتان مەن باسىمدى تەك قانا مەنىڭ تىلەگىمدى قاناعاتتاندىراتىن بيلىككە يەمىن».
سىلتەمە: قازاقستاننىڭ جالپىۇلتتىق قاسيەتتى نىساندارى. –استانا: فوليانت، 2017. –407-409 بب.؛ قاسيەتتى قازاقستان. 1-توم. –الماتى: «ارىس» باسپاسى، 2017. –177-ب.
