رەسپۋبليكا الاڭى – الماتى قالاسىنداعى ەڭبەكشىلەر قاۋىمىنىڭ مەرەكەلىك سالتاناتتى شەرۋلەرى، سونداي-اق اسكەري پارادتار وتەتىن ورىن. 1980 ج. اشىلعان.
رەسپۋبليكا الاڭىندا تاۋەلسىزدىك مونۋمەنتى (1996) ورناتىلعان. تاۋەلسىزدىك مونۋمەنتى 1996 جىلى 16 جەلتوقساندا اشىلدى. مونۋمەنت الماتى قالاسىنداعى رەسپۋبليكا الاڭىندا ورنالاسقان.
قازاقتىڭ قولدانبالى ونەرىنەن تامىر تارتقان تاۋەلسىزدىك مونۋمەنتىنىڭ نەگىزگى ورتاسىندا كومپوزيتسيياسى ۇلتتىق ورنەكپەن كومكەرىلگەن تەكشەلى دىڭگەك تاستان قۇرالىپ، ونىڭ بيىكتىگى 28 م-گە جەتەدى.
كوك اسپانعا قاراي شانشىلا بوي كوتەرگەن ورتالىق دىڭگەكتىڭ ۇشار باسى قاۋىزى اشىلماعان قىزعالداق ٴتارىزدى جۇمىرلانىپ مۇسىندەلگەن ٴارى وعان قازاقستاننىڭ ەلتاڭباسى ويىلىپ تۇسىرىلگەن. ونىڭ ۇستىڭگى جاعىنداعى قولادان قۇيىلعان قاناتتى بارىستىڭ ۇستىندە وڭ قولىندا قىران قۇسى، سول قولىندا ساداعى، بەلىندە قانجارى مەن اسىنىپ العان قورامساعىنداعى ساۋىت، بۇزار التىنعا مالىنعان جەبەلەرى بار دۋلىعالى جاس ساربازدىڭ قۇرىشتاي مىعىم ٴبىتىم-تۇلعاسى (بيىكتىگى 6 م، ال سالماعى 4 ت) اسا ايبارلى كەيىپپەن، تاۋەلسىزدىك مونۋمەنتىنىڭ بەرىكتىگى مەن اۋقىمدىلىعىن ايقىن اڭعارتادى.
سىلتەمە: قازاقستاننىڭ جالپىۇلتتىق قاسيەتتى نىساندارى. –استانا: فوليانت، 2017. –465-466-بب.
