شىركەۋ قوستاناي وبلىسى ۇزىنكول اۋدانىنىڭ پرەسنوگوركوۆ اۋىلىندا ورنالاسقان. سولتۇستىك قازاقستان اۋماعىندا ساقتالعان XIX ع. باسىنداعى ەڭ كونە پراۆوسلاۆيە شىركەۋلەرىنىڭ ٴبىرى. باسىندا اششىكولدىڭ جاعاسىندا وسەتىن قىزىل ورمان قاراعايىنان اعاش شىركەۋ جاسالعان، ٴبىراق ول 1798 جىلى ورتەنىپ كەتەدى. شىركەۋ كەسەك تاستان جانە كۇيدىرىلگەن كىرپىشتەن 1799 جىلى جەرگىلىكتى تۇرعىنداردىڭ جاردەمىمەن سالىندى. قۇرىلىس كەزىندە جۇمىرتقا اقۋىزى مەن الەباستر قوسىلعان ەرەكشە قوسپانى پايدالانعان. تاس شىركەۋ اۋليە نيكولاي چۋدوتۆورەتس پەن قازان قۇداي اناعا ارنالعان، اعاش دۋالمەن قورشالعان جازعى جانە قىسقى ەكى بولىكتەن تۇرادى. شىركەۋ قابىرعاسىنىڭ جانىندا 1835 جىلى وبلىستى ارالاپ جۇرگەندە كەنەت قايتىس بولعان ومبى وبلىستىق باسقارماسىنىڭ باستىعى، گەنەرال-لەيتەنانت ۆاسيليي يۆانوۆيچ دە سەنت-لوراننىڭ زيراتى ورنالاسقان.
يۋ.ف.ەرمولاەۆتىڭ ەستەلىگىنەن (1926 ج.ت.): «نيكولسكيي شىركەۋى ورتالىق الاڭدا تۇردى. ۇلكەن جانە كىشى شىركەۋ مۇناراسى بار تاماشا ساۋلەتتىك عيمارات. ۇلكەن مۇنارانىڭ ٴتورت جاعىنان ٴتۇرلى پىشىندەگى قوڭىراۋلار ٴىلىنىپ تۇراتىن. سولتۇستىك جاعىنان – ەڭ ۇلكەن قوڭىراۋ، 1678 جىلى قۇيىلعان، شىعىس جاعىندا 2 قوڭىراۋ، باتىس جاعىندا كىشكەنتاي 8 قوڭىراۋ بولاتىن. ەكىنشى مۇنارا بىرىنشىسىنەن الاسا جانە شىركەۋدىڭ شىعىس بولىگىندە ورنالاسقان. شاتىرى قاڭىلتىرمەن جابىلعان جانە جاڭا سيياقتى جىلتىراپ تۇراتىن». 1938 جىلى شىركەۋ جابىلىپ، استىق ساقتايتىن قويماعا اينالدى. 1991 جىلدان باستاپ شىركەۋگە ٴىشىنارا جوندەۋ جۇمىستارى جۇرگىزىلىپ، قايتا جۇمىس ىستەي باستادى. 2005 جىلدىڭ جازىندا شىركەۋ قايتا قالپىنا كەلتىرىلىپ، كەلۋشىلەرگە ەسىگىن ايقارا اشتى.
سىلتەمە: قازاقستاننىڭ وڭىرلىك قاسيەتتى نىساندارى. –استانا: فوليانت، 2017.
–289 ب.؛ قاسيەتتى قازاقستان. 3-توم. –استانا: 2019. –207-ب.
