ويىل مەشىتى

اقتوبە وڭىرىندەگى كونە عيباداتحانالاردىڭ ٴبىرى ٴارى بىرەگەيى بولىپ سانالاتىن ويىل مەشىتى 1893 جىلى سالىنعان. مەشىت اقتوبە وبلىسى ويىل اۋدانى ويىل اۋىلىندا ورنالاسقان.

كۇيدىرىلگەن قىزىل كىرپىشتەن تۇرعىزىلعان مەشىت ٴۇيى تالاي جىل قاراۋسىز قالسا دا اسىلدىڭ سىنىعىنداي بولىپ بۇگىنگى كۇنگە جەتىپ وتىر. ىرگەتاسى تابيعي تاسپەن توسەلىپ، تاستاما بەلدىكتەرى تۇيە اربامەن ورىنبوردان تاسىلعان، تابانى قىزىل كىرپىشتەن قالانعان. العاشقى باس يمامى ساعيدوللا ىزتىلەۋوۆ – اراب، پارسى، ورىس تىلدەرىن يگەرگەن ساۋاتتى ادام بولعان. ⠀حح عاسىردىڭ 30-شى جىلدارى مەشىتتىڭ ٴدىني بەلگىلەرى قيراتىلىپ، دراما تەاتر ۇيىنە، تەحنيكالىق-شارۋاشىلىق قويماسىنا اينالدىرىلدى.⠀تاۋەلسىزدىك دەمىمەن قايتا 1999 جىلى جوندەلىپ، قايتادان مەشىتتىك قالپىنا كەلتىرىلدى. 2014 جىلى كۇردەلى جوندەۋدەن وتكىزىلدى.

مەشىت تاريحىنا قاتىستى ەل اۋزىندا تاراعان اڭىزعا تولى اڭگىمەلەردىڭ ٴبىرى – ويىلداعى جەر استى جولىنىڭ مەشىتپەن ۇشتاسىپ جاتقاندىعى. وسى جەر استى جولى ارقىلى كوپەستەر ساۋدا قاتارلارىنا جانە باي كوپەستىڭ ۇيىنە قاتىناپ وتىرعان.

مەشىت كۇمبەزىنىڭ العاشقى ٴتۇپنۇسقاسى مۇسىلمان كۇمبەزى ىسپەتتەس كۇمىستەن جاسالىپ، ۇلكەن ايشىعى بولعان. ساياسي قۋعىن-سۇرگىن جىلدارى مەشىت كۇمبەزى قۇلاتىلىپ، جەرگىلىكتى سايدىڭ بويىندا جاسىرىلعان دەگەن اڭىز دەرەكتەر كەزدەسەدى.

سىلتەمە: قازاقستاننىڭ وڭىرلىك قاسيەتتى نىساندارى. –استانا: فوليانت، 2017. –126-ب.