كەسەنە قوستاناي وبلىسىنىڭ ورتالىعى قوستاناي قالاسىنان 7 كم جەردە، توبىل وزەنىنىڭ وڭ جاعالاۋىندا ورنالاسقان. 1960 جىلى قۇلپىتاس ورناتىلدى. 1991 جىلى ى. ٴالتىنساريننىڭ 150 جىلدىعىنا وراي ەسكى ەسكەرتكىشتىڭ ورنىنا الاڭى 1,5 گا بولاتىن كەسەنە تۇرعىزىلدى. كەسەنە پورتالدى، كۇمبەزدى.
ىبىراي (شىن اتى – يبراھيم) التىنسارين (1841-1889) – اسا كورنەكتى اعارتۋشى-پەداگوگ، جازۋشى، ەتنوگراف، فولكلورشى، قوعام قايراتكەرى. ىبىراي التىنسارين قازاقتىڭ اعارتۋشىلىق تاريحىندا جانە ۇلتتىق مەكتەبىنىڭ قالىپتاسۋىندا تەرەڭ ٴىز قالدىردى. «قازاق حرەستوماتيياسى» اتتى وقۋلىق، «قازاقتارعا ورىس ٴتىلىن ۇيرەتۋدىڭ باستاۋىش قۇرالى» اتتى ديداكتيكالىق وقۋ قۇرالىن جازدى.
ى. التىنسارين العاش ادەبيەتىمىزدە پروزا جانرىنىڭ دا نەگىزىن قالادى. ول اڭگىمەلەرىندە جاس شاكىرتتەردى ادامگەرشىلىككە، ىزگىلىك پەن باۋىرمالدىققا، ادال ەڭبەك پەن ادىلدىككە، ادەپتىلىك پەن سابىرلىلىققا، زەيىندىلىك پەن ٴبىلىمدى ەركىن يگەرۋگە شاقىردى. 1879-1883 جىلدار ارالىعىندا تورعاي وبلىسىنىڭ ٴتورت ۋەزىندە تورعاي، ىرعىز، ترويتسك، اقتوبەدە جاڭا مەكتەپتەر اشتى. ورىنبورداعى ورىس جاعرافييالىق قوعامىنىڭ تولىق قۇقىقتى مۇشەسى بولدى.
سىلتەمە: قازاقستاننىڭ جالپىۇلتتىق قاسيەتتى نىساندارى. –استانا: فوليانت، 2017. –394-397-بب.
