الاشوردا ۇكىمەتىنىڭ باتىس قاناتى – كۇنباتىس الاشورداسىنىڭ ورتالىعى بولعان جىمپيتى سەلوسىندا (باتىس قازاقستان وبلىسى سىرىم اۋدانى) الاش تاريحىمەن بايلانىستى بىرنەشە عيمارات ساقتالعان.
1918-1919 جىلدارى جاھانشا مەن حالەل دوسمۇحامەدوۆتار باسقارعان كۇنباتىس الاش وردا ۇكىمەتى وسى تاريحي عيماراتتا ورنالاسقان. الاش جۇرتى ازاتتىققا قول سوزعان 1917-1918 جىلدارى الاشوردانىڭ باتىس قاناتى ەڭ ۇزاق: 19 اي – 578 كۇن بويى ٴومىر سۇرگەن.
بۇل عيمارات 1867 جىلدارى سالىنعان، ەكى قاباتتى اعاش ٴۇي، قابىرعاسى سامان تاستان تۇرعىزىلىپ، سىرتقى قاباتى تاقتايمەن قاپتالعان. ورىس ساۋداگەرى وسى عيماراتتى سالعاننان كەيىن 1890 جىلدىڭ اياعىندا استىق تارتاتىن مەحانيكالىق ديىرمەن سالادى. وندا سوكتەن باستاپ ەڭ قىمبات ساپالى استىق تارتىپ، ورىنبور، ورالعا دەيىن جەتكىزىپ ساتقان. 1917 جىلى شىلدە ايىندا الاش پارتيياسى قۇرىلدى. وسى عيماراتتا 1918 جىلدىڭ اقپان ايىنان 1920 جىلدىڭ قازان ايىنا دەيىن «الاشوردا» ۇكىمەتى ورنالاستى.
كۇنى بۇگىن بۇل عيماراتتا سىرىم داتۇلى اتىنداعى تاريحي-ولكەتانۋ مۋزەيىنىڭ «الاش» زالى ورنالاسقان، بۇل زال الاشوردانىڭ 95 جىلدىعىنا وراي اشىلعان.
سىلتەمە: قازاقستاننىڭ جالپىۇلتتىق قاسيەتتى نىساندارى. –استانا: فوليانت، 2017. –458-460-بب.
