ابىلاي حان رەزيدەنتسيياسى سولتۇستىك قازاقستان وبلىسىنىڭ ورتالىعى پەتروپاۆل قالاسىندا ورنالاسقان. «ابىلاي حان رەزيدەنتسيياسى» كەشەنىنىڭ ابىلايدىڭ ٴۇيى دەپ اتالاتىنى تۋرالى تالاس كوپ.
1765 جىلى سالىنعان ٴۇي «حان رەزيدەنتسيياسى» بولىپ تابىلماعان، ويتكەنى وسى كەزدە ابىلاي تەك سۇلتان اتاعىنا يە بولىپ جۇرگەن. ابىلاي حاننىڭ سۇراۋىمەن جانە پاتشا ۇكىمەتىنىڭ رۇقساتىمەن ەسىل وزەنىنىڭ قاسىندا ٴبىر ٴۇي شىن مانىندە سالىنعان ەدى. ٴۇي اعاشتان سالىنعان. وندا كوپتەگەن مەملەكەتتىك، ساياسي ماسەلەلەر قارالعان. اڭىز بويىنشا، بۇل ٴۇي ورتكە ۇشىراپ، كەيىن ورنىنا 1829 جىلى وسى ەكى قاباتتى تاس ٴۇي سالىنعان.
2008 جىلى اشىلعان ابىلاي حان رەزيدەنتسيياسىندا XVIII عاسىرداعى قازاق ورداسىنىڭ حانى، كورنەكتى مەملەكەت قايراتكەرى، قولباسشى، ديپلومات تۇلعاسىن اشىپ بەينەلەيتىن جادىگەرلەر، ديوراما قويىلعان. ەكسپوزيتسييا ورنالاسقانعا دەيىن رەزيدەنتسييا «اق ٴۇي»، «ابىلاي حاننىڭ ٴۇيى»، «اسكەري لازارەت» دەپ اتالعان.
سىلتەمە: قازاقستاننىڭ جالپىۇلتتىق قاسيەتتى نىساندارى. –استانا: فوليانت، 2017. –341-343-بب.
